JUBANOV ÝNIVERSITETI ÓKILDERI TÚRKIYA SAPARYNDA QR ELSHILIGINDE BOLDY

Q.Jubanov atyndaǵy Aqtóbe óńirlik memlekettik ýnıversıtetiniń rektory, professor Baýyrjan Erdembekov bastaǵan delegacıya músheleri Túrkıya Respýblıkasy Ankara qalasyndaǵy resmı is-sapary ayasynda QR Túrkıya Respýblıkasyndaǵy tótenshe jáne ókiletti elshisi Abzal Saparbekuly myrzanyń qabyldaýynda boldy.

Kezdesýde Q.Jubanov atyndaǵy Aqtóbe óńirlik memlekettik ýnıversıteti men elshilik arasyndaǵy yntymaqtastyqty nyǵaıtý máseleleri talqylandy. Baýyrjan Amankeldiuly elshiliktiń qabyldaýyna alǵys bildirip, Túrkıya eline jasalyp otyrǵan resmı is-sapardyń maqsaty men mańyzdylyǵy jaıynda áńgimelep berdi.

Ýnıversıtetimiz Batys Qazaqstandaǵy jetekshi ýnıversıtetterdiń biri bolyp tabylady. Ýnıversıtet aımaqtyń iri bilim berý, ǵylymı jáne mádenı ortalyǵy retinde erekshelinedi. Búginde Túrkıya elinen basqa da alys-jaqyn shet eldermen yntymaqtastyq kelisimderin jasaǵan irgeli joǵarǵy oqý orny. Bizdiń saparymyzdyń maqsaty — damyǵan Túrkıya eliniń joǵary oqý oryndarymen tyǵyz baılanys ornatý, ortaq joba kurý, ózara stýdent almasý, qos dıplomdy bilim berý, ǵalym– professorlardy shaqyrtý jáne basqada baǵyttar boıynsha birlestikte jumystar júrgizý. Qazirgi tańda ýnıversıtetimizde zamanaýı talaptarǵa saı ınnovacıyalyq — tehnologıyalar parki, ǵylymı ortalyqtar men ǵylymı-zertteý zerthanalary ashyldy. Sol zerthanalardyń biri túrkitektes memleketterdiń mádenıetin, tilin, tarıhyn zerttep, ózara yntymaqtastyq pen yqpaldastyqty bir arnaǵa toǵystyrý maqsatynda ashylǵan Túrkologıya zerthanasy bar. Elimizdiń latyn álipbıine kóshý ultymyz úshin jasalǵan mańyzdy qadamdardyń biri. Uly Dala eliniń tarıhyna kóz júgirtsek, birinshi tuǵyry baılyq – jer, ekinshisi – til, úshinshisi – memleket jáne onyń tarıhy bolýy kerektigi aıqyndalady. Osy turǵyda kırıll álipbıin latyn álipbıine tez arada aýdarylyp jazý maqsatynda kózdelgen jańa jobalar boıynsha Túrki eliniń ǵalym professorlarymen tyǵyz baılanys jasaýdamyz,- dedi rektor.

Abzal Saparbekuly bul jasalyp otyrǵan resmı is-sapardyń oń nátıjeli bolatynyna senimin bildirdi. Ol: «Qazirgi ýaqytta eki el arasyndaǵy ekijaqty qatynastar jemisti damýda. Qazaqstan men Túrkıya arasyndaǵy bilim jáne ǵylym baǵytyndaǵy ózara áriptestik qarqyndy damýda. Bilim salasynda ózara yqpaldasýdyń jarqyn mysaly retinde Túrkıya eline kelip bilim alyp jatqan qazaq stýdentter sanynyń kúnnen kúnge artyp kele jatqany dálel. Sizderdiń bastap jatqan jańa jobalaryńyzdy qoldaımyz, aldaǵy ýaqytta ózara birige jumystar atqaratynymyzǵa senimdimin. Elshilik tarapynan qandaı kómek qajet etseńizder, biz sizderge árqashan qoldaý kórsetetin bolamyz»,- dedi.

Aldaǵy ýaqytta Jubanov ýnıversıteti QR Túrkıya Respýblıkasyndaǵy elshiligimen tyǵyz qarym-qatynasta jumys jasaıtyn bolady. Sonymen qatar kezdesýde Túrkıya eline oqýǵa jiberiletin Jubanov ýnıversıteti stýdentterine arnaıy qaýipsizdik sharalary retinde qoldaý kórsetip, elshilikke kelip tirkelý jumystaryn jasaıtynyn málimdedi.

Related posts